in

麵書 20210310

精彩的瞬間,源自於感恩每一個生活細節
因工作需要一日走勻港九新界,本身唔太鍾意咁唔 efficient 嘅行程安排,時間都用晒喺 travel,唯有善用呢啲零碎時間,聆聽我 mentor 推薦嘅一啲演講錄音,閱讀一啲有助於發展潛能嘅書籍,同埋搵一啲感動味蕾嘅拉麵店。
今次喺灣仔試咗一間都有唔少好評嘅拉麵店,好想講開住 google map 去尋訪美食,其實係一個幾有趣嘅體驗。我今次試嘅係一款期間限定拉麵,一如既往選擇醬油湯底,令我好 impressive 嘅係一片浸喺湯裡面薄薄一片嘅檸檬,輕微嘅酸味成為咗一個清新嘅點綴,有別於之前食過嘅柚子醬油沾麵,呢種清新配合本身比較清雅嘅醬油湯底,俾到我一種輕鬆嘅感覺,呢個湯唔會有太多嘅層次,但係你會好渴望飲完一啖再飲一啖,去保留與舌尖短敍的興奮。
湯底我好滿意,係另一種醬油體驗。配菜方面,三條蟹腳好睇,兩片叉燒好食,筍都算係合格水平,我加咗隻醣心蛋,平心而論,隻蛋唔係好啱我口味,有少少似扮雞蛋嘅皮蛋,而且同呢個組合唔係好夾,就好似 X-Japan 嘅 Hide 加入蘇打綠咁,不過我好想讚啲蔥絲,不單止冇臭青味,吸咗湯汁再咀嚼嘅時候,簡直就即時出現好似 Joker 嘅著名台詞”You complete me!”嘅意境,趁限定真係要試多次。至於啲麵,係 OK 嘅!掛湯力一般,不過配咁清新嘅湯,掛湯力唔太強都不影響。
呢次一個人食麵,又悟到少少做人需知,其實呢間拉麵店主打豬骨湯底,但係我仍然揀返我想要嘅醬油湯底,仲要係期間限定,可一不一定可再。人生就係咁,你最擅長嘅未必係人哋想要嘅,人哋想要嘅,你可能曇花一現幫佢攪掂,不過唔一定有下一次嘅奇蹟,然而對方就會將呢個咁美好嘅瞬間記一世,所以將自己所能做嘅做到最好,期待可以放喺自己身上,但係唔好為咗迎合別人攪到自己四不象,每一個人都有其存在價值,予以尊重,能欣賞更好,讓人生在不斷尋覓與嘗試中定義出各自的獨特性。
最後,我會考慮試試呢間嘅豬骨湯底,港島嘅朋友歡迎相約一同品嘗😊
#smilence

#BWW

#享受未知的揭盅一刻

#感恩經歷的每個瞬間

Report

What do you think?

Leave a Reply

GIPHY App Key not set. Please check settings

15

拍摄一组护肤品

麵書 20210219